كتب/نهى اوسامة
إزيك !
عايز أتكلم معاك عن المقارنات،
بص يا صديقي هقولك على حاجه : دلوقتي حماده عنده قدره جامده جداً ومفيش منه إتنين .. أنا مالي ؟
يعني أنا لما يتقالي إنت ليه مش زي حماده الجامد جداً وأحس بإهانة وذل في الموضوع هل أنا كده هغير بقى وهفضل أفرك عشان ابقى زي حماده ؟
لا خالص
ما يولع حماده،
مهو حماده مميز في حاجه وانا مميز في حاجه تانيه، لو انا وحماده بقينا زي بعد يبقى فين بقى التكمله ؟
هو المفروض نكون كلنا حماده !
طب هنتخيل سوا إن حماده الجامد جداً شغال طيار ومفيش منه إتنين ومعاه ٧ لغات ومثقف وچنتل وبيطير في الجو،
لو عربيته باظت هيروح يصلحها عند ميكانيكي ممكن يكون مبيعرفش يقرأ ويكتب أصلاً !
بس الفكره في ايه بقى ؟
إن حماده اللي مفيش منه إتنين معرفش يصلح عربيته لنفسه، والميكانيكي مبيعرفش يطير في الجو .. هو ده بقى التكافئ.
– أنا بكملك، وإنت بتكملني –
لكن لو هنمشيها منظره على بعض يبقى لأ أنا مش هتقارن بحد، إنت جامد ومفيش منك إتنين وأنا عيل صايع وغلبان مليش في أي حاجه .. هو ده اللي حماده عايز يسمعه !!
هي دي الفكره بقى، أنا دلوقتي مثلاً دكتور .. فيقوم حماده يفرك ويبقى دكتور هو كمان،
باقي العائله الكريمه تغار وتفرك ونبقى كلنا دكاتره ماشاء الله، جميل جداً كلنا ناجحين .. فين بقى باقي الوظايف ؟
ولا إحنا مهمتنا دكاتره بس ملناش دعوه بالباقي !
” الملخص يا صديقي والإفاده ”
هم كويسين وأنا كويس، وأنا لو شايف إني المفروض اعمل حاجه عشان مجرد الفخر بيها قدام الناس مش هعملها،
هو أنا فعلاً المفروض أجتهد وأدعي ربنا إني أنال اللي في بالي عشان أروح أعاير حد تاني ؟
النجاح مهم ومطلوب بس ليا أنا مش ليك إنت،
اللي هو ده نجاحييي بتاعي انا مش بتاعك إنت وأنا لو بقيت فاشل الناس هتقول عليا أنا اللي فاشل مش هتقول عليك إنت .. يبقى سيبني بقى أعمل اللي انا مرتاح له من غير ما تقارني بحماده الجامد جداً !
(ده مش تبرير للفشل)
الرياضه تكاد تكون ماده صعبه بالنسبه لبعض الناس مع إنها بالنسبه ليا لذيذه جداً،
شوفت بقى إنت مميز في حاجه وأنا ربنا ميزني في حاجه تانيه إزاي !!
مهو ده التكافئ يا صديقي، في عز ما إنت بتنام بالليل عشان ترتاح في واحد إختار يكون واقف في الشارع يحميك وهو برضه مرتاح،
مش محتاج أتقارن بحد عشان تحمسني ولا محتاج أعرف إن حماده جامد جداً،
هو له مميزاته وأنا ليا مميزاتي، هو له قدراته وأنا ليا قدراتي، هو له ظروفه وأنا ليا ظروفي،
لما توفرلي الظروب المناسبه عندي وعند حماده يبقى ساعتها قارن بيننا لكن غير كده فإحنا مخلوقين في الدنيا عشان “نكمل بعض” مش أكتر،
بس كده يا صديقي حاول ديماً تكون شخص قنوع وترضى باللي في إيدك ومتقارنش نفسك بحد ولا تسمح لحد يقارنك،
“إنت جميل وحماده جميل بس كل واحده في مجاله جميل.”
سلام ..🤍
