كتب/عزة صبري
الفستان السنة دى اخد نصيب الاسد زى مابيقولوا فى عالم الموضة والتصميمات…ولاننا خلاص داخلين على فصل الصيف فحبيت اشارك معاكم بعض الموديلات والألوان اللى هتكون سائدة هذا الفصل..
بالنسبة للفستان فموضة فستان القصات او البرنسيس زى ماكنا بنقول عليه فى التسعينات رجع تانى وباكتساح…كمان قماش الشيفون والكريب هو اللى تقريبا مستخدم فى الموديلات دى..بجانب الاقطان طبعا لانها بطلة الصيف بلا منازع…ودلوقتي انتشر اقمشة الكتان المعالج والاقطان اللى مابتتكسرش او تتكرمش نتيجة الاستعمال وده طبعا سهل علينا كتير جدا …اما بالنسبة للالوان فالصيف ده هيتميز بكل الألوان المبهجة والهادية فى نفس الوقت زى الاوف وايت والزهرى والكمشير والموف الهادى واللى بيسموه لافندر…
مع استمرار القماش المشجر ولكن بورود اصغر حجما من العام الماضى..وماننساش القماش المنقط والمقلم واللى تقريبا معانا بقالهم كذا سنة ولسة مكملين بجدارة…
كمان البنطلون الواسع موضة جدا السنة دى…
فسواء كنتى محجبة او لاء..سيدة فى متوسط العمر او بنوتة فى مقتبل العمر فالصيف ده مصممى الازياء وفروا لك موديلات تناسبك وبالخامات اللى تحبيها …ودى بعض الصور لبعض الموديلات
