المال السايب يعلم السرقه

كتبت ريهام طارق
في مثل شعبي بيقول ” المال السايب بيعلم السرقه”
ومثل تاني بيقول “تديله ايدك ياكل دراعك”
الامثله دي بقا معناها انك لما بتدي زياده أوي بتتسرق أوي وبتحول كل اللي حواليك لحراميه
جدعنتك الزيادة بتعلم السرقه. حنيتك الجامده بتعلم السرقه. إهتمامك الزايد بيعلم السرقه طيبتك و ثقتك إللي مش في محلها بتعلم السرقه
انك تدي طول الوقت وانت مش مستني مقابل بيعلم السرقه.
وبتخلي الناس تشوفك مضمون و مهما كانوا قياسيين عليك عمرك ما هتقدر تبعد او تستغني عنهم
الناس مش بتحب الحاجه الرخيصه او المرطرطه في السوق الناس مش بتحب غير كل عزيز وغالي
حبك ، كرمك ، مشاعرك ، احساسك ، اهتمامك لو اديتهم للناس بجرعات زياده
كل حاجه عملتها بحب او جدعنه وكل تفكيرك انك كدا بتعمل خير كانت فرصه من دهب لإستغلالك وسرقتك من كل اللي حواليك
وهتخليهم بسرقوا منك الاغلي من الفلوس هيسرقوا منك طاقتك ، مشاعرك، حلمك هيسرقوا منك طبعك الحلو
. والأصعب من كدا هيسرقوا منك سنين عمرك إللي مستحيل تعوضها ولا تقدر ترجعها
علشان كدا لازم نتعلم الإعتدال.. الإعتدال في كل حاجه علشان ما بنعلمش الناس السرقه بمعاملتنا الغلط ونساعدهم انهم يتحولوا حراميه غير الحراميه اللي حوالينا واللي ممكن يكونوا اقرب الناس ليك..
اعتدلوا فخير الأمور الوسط
#ريهام_طارق