#حبة نفسنة#

#حبة نفسنة#
مين فينا ياامهات ماكسرتش كوباية او طبق..وصادف لحظة وقوع الكوباية منها دخول حد من اولادها بحماس الطفولة وهو بينادى عليها….وهى مازعقتش وقالت له شايف عملت ايه..خليت الكوباية تقع منى تتكسر…وهو مالمسهاش اصلا…ده اسمه إسقاط…نوع من انواع الحيل الدفاعية النفسية…
ماصدفش مرة زوجك رجع من الشغل متعصب لان المدير بتاعه وبخه او ضغط عليه..وانفجر فيكى اول ماكلمتيه انتى او حد من الأولاد…ده اسمه إزاحة…حيلة دفاعية نفسية ..الزوج ماقدرش يواجه المدير بغضبه..فوجه غضبه ناحية شخص اقل ايذاءا وآمن انه أضعف منه…
ماصدفتوش ولد اتنقل لمكان جديد ..مدرسة مثلا..وخاف من التجمعات المشهورة..الشلة يعنى انهم يؤذوه..فاظهر لهم ان شخصيته شبههم بكل الصفات اللى بيخاف منها ويكرهها..علشان يندمج معاهم ويتقى شرهم..ده اسمه الاستدماج..حيلة دفاعية نفسية…
اختلفت مرة مع حد وحسيت بالذنب وحاولت ترضيه بأنك تتعامل معاه بمنتهى اللطف بعد كدة علشان تمسح تأثير لحظة الصدام اللى حصلت بينكم ولكن بطريقة مبالغ فيها…ده اسمه رد الفعل المعاكس..نوع من انواع الحيل الدفاعية النفسية…
لاحظتوا اكيد ابنكم الاول بعد ما انجبتم اخ او اخت ليه بيقوم بحركات طفولية لا تتناسب مع المرحلة العمرية العمرية اللى بيعيشها…كأنه يبلل فراشه مثلا…او يتكلم بطريقة طفل لم يجيد الكلام بعد….او يرغب فى العودة للرضاعة من أمه…ده اسمه نكوص…حيلة دفاعية نفسية أخرى…
فيه غيرهم كتير…طبعا…
كلهم بيمثلوا خطورة على صحة الشخص النفسية..لاء طبعا..
كلهم مرفوضين اجتماعيا واخلاقيا..لاء طبعا…
طيب ايه السبب فى ان يسلك شخص ما مثل ذلك السلوك ويقوم بممارسة مثل تلك الحيل…
هنرجع بالزمن لمرحلة تكوين الفرد..واللى قسمها فرويد لثلاث أقسام وهى..
الأنا….يعنى الذات..
الهو..يعنى الغرائز والرغبات..
الأنا الأعلى…يعنى القيم السامية والمبادئ العليا…
اى شخص زى ماقلت لكم قبل كدة..بداخله اكثر من شخصية بمختلف المراحل…شخصية الطفل((الهو))….وشخصية الشيخ الراشد..((الأنا الاعلى))
والشخصية الحقيقية اللى بتظهر للناس وبيتعامل بيها..((الانا))
الصراع ديما بيكون بين الطفل اللى عاوز يلبى كل رغباته ويشبع جميع غرائزه بدون ضابط او رادع…وبين الشيخ الحكيم العاقل اللى عاوز يتبع القيم العليا والمبادئ السامية…
فهنا بيجى دور الحيل الدفاعية النفسية علشان تحمى الانسان من عواقب الصراع ده..وعلشان تقدر تتقبل صورته الذاتية واللى ماحدش يقدر يعرفها ولا يشوفها غيره هو شخصيا…
فلما بيتفاجئ بكم الرغبات والشهوات اللى بتحرك بداخله…واللى بيرفضها فى نفس الوقت وخجلان من وجودها …فبيلجأ لأولى وأهم ومنبع الحيل الدفاعية النفسية..وهى الكبت…واللى بينتج عنه ظهور باقى الحيل اللى ذكرتها لكم سابقا…وغيرها كثير لا يتسع الوقت لسردها ولكن اوعدكم أن شاءالله بانى اتكلم معاكم فيها مرة تانية…
فى نهاية كلامى اتمنى اكون قدرت ابسط لكم الموضوع…واقرب لكم الصورة الواقعية لعالم النفس البشرية الواسع ..أوسع من الكون نفسه..واعمق من أكبر المحيطات..واللى كل يوم العلماء بتكتشف سر جديد من أسرار النفس البشرية…ولسة هتكتشف…ولو انى اعتقد انه سيظل هناك سر ما..وغموض ما..لا يستطيع اكتشافه العلماء…لتبرير سلوك ما…قد يصدر من احد الاشخاص…ليبقى الانسان واسراره النفسية صندوق اسود….يفاجئ البعض…مهما ادعى الاخرون المعرفة الكاملة لذلك الشخص…
وللحديث بقية….
#azza sabriy #