بقلم ريهام طارق
عارف أنت فرحت ليه لما شفت شريهان علي الشاشه تاني
الموضوع مش موضوع نجمه اختفت ورجعت للمجال تاني القصه قصه تانيه خااااااااالص.
أنت لما شفت شريهان شفت نفسك فيها حسيت للحظه انك رجعت طفل صغير تاني
متاكده انك أول ما شفتها قلبك عمل فلاش باك وغمضت عيونك وشفت نفسك في بيت جدتك قبل الفطار ولمه العيله ومعاك كل ولاد خالك وخالتك وانتوا بتلعبوا قبل الفطار و تسمع صوت القران علي الراديو
تجري تحجز مكانك علي السفره مع نظرات مامتك طبعا إللي هو عيب متمدش ايديك
افتكرت شكل التمر وقمر الدين وصنيه الكنافه إللي لسه خارجه من الفرن وبعدها تتفرج علي ألف ليله وليله وفوازير شريهان وحوار صريح جدا جدا وطبعا النينجا تيرتلز وشويه نسمع صوت صلاه التراويح وبعدها بشويه يعدي المسحراتي من تحت البيت ونجري ننادي عليه ونقوله اسامينا عشان ينادي بيها
افتكرت بتضحك قلبك وجعك
شريهان مش اعلان ولا رجوع ممثله بعد فتره شريهان عمرنا إللي جري بسرعه من غير ما نحس
