#كلمتين_وبس

بقلم ريهام طارق
يا اميرات الكوكب وجميلات العالم يا بنات حواء كل واحدة فيكم لمبتها في أيدها
كل واحدة فينا عارفة آمتا وازاي قصرت في حق نفسها
🛑قصرتي في حق نفسك لما اتنازلتي عن حقك و سيبتي لمبتك في ايد شخص تاني يتحكم فيها بمزاجه بكامل إرادتك
واديتي له الحق يطفي لمبه صحتك ..أنوثتك .. نفسيتك …مشاعرك.. روحك
🛑قصرتي في حق نفسك بدافع الحب .. التعلق .. إرضاؤه .. الاحتياج أي أن كان المبرر وسمحتي لكائن بشري انه يطفي جمالك وحيويتك
كل واحده فينا عارفة إيه سر جمالها
كلمه سر جمالك تقبلك لذاتك و حبك لنفسك وثقتك بشخصيتك
في ست جمالها في روحها.. و ست تانية في ضحكتها .. وفي ست جمالها في حنيتها.. و في ست جمالها في رقتها أنوثتها وعذوبتها
و في ست تحيرك تغيرك تدلعك تخليك ترجع العمر اللي راح و تعيشه تاني
جمالك قرارك
يقولوا دي إحلوت علشان اتطلقت و بعدت عن الهم .
إحلوت علشان أخدت القرار انها تندمه عليها ..
إحلوت علشان أخدت القرار أن محدش يشمت فيها
إحلوت علشان أخدت القرار انها توقعه فيها
إحلوت علشان اخدت القرار تظهر قدامه أحلي من اي واحدة عرفها
إحلوت علشان أخدت القرار تدخل قلبه و تقفل وراها بابه
الست لما بتاخد قرار انها تحلو بتحلو بس الاهم ان قرارك
يكون مش مرتبط بوجود راجل أو لا
خدي قرار إنك تفضلي جميله علشانك أنتي مش علشان أي حد
خدي القرار واحلوي علشان تفضلي منوره وتحسي بقوتك
وخلي دايما لمبتك في إيدك نوريها دايما اوعي تطفيها
ولو همك راجل فالراجل بيجي علي ضيك مش عتمتك
إفضلي منورة لنفسك عاندي أي ظروف و أي ضغوط و أي مشاكل خليكي قويه
و متنسيش خلي دايما لمبتك في ايديك.