أنا إسمي هدير جاد ، 27 سنة
إتخرجت من كلية العلوم – جامعة بنها بتقدير عام إمتياز
أول ما اتخرجت جاتلي منحة بره مصر ” نيوزلاندا ” بس قررت اكمل ماستر في جامعتي لاءني كنت بدأت رحلة جديدة هنا وعايزة اكملها ” رحلة البحث عن اهدافي ومكاني في المستقبل ، هو انا عايزة أكون إيه وفين !! ”
خلصت الكليه في 7 _2017
إشتغلت في مجال التحاليل الطبية شهرين ، بس النتيجة إني ملقتش نفسي فيه ” لاء مش هو ده مجالي اللي هكون مُبدعة فيه ” بعدها خدت قرار إنه مش هاخد دبلومة البيوكيمستري ” محبتش أنساق ورا فكرة إني أخد دبلومة كمجرد شهادة لاء طول الوقت كنت بدور ع الحاجة اللي تفيدني وتكبرني ف الكارير اللي أنا حباه ووقتها هقدر أخد كورسات كتير تخليني مختلفة ومُبدعة فيه ”
في 9_2017 ، قدمت علي شغل في شركة أدوية والحمد لله إتقبلت ضمن عدد كبير كان موجود ، وقتها إتقالي بالنص ” إنتِ اتقبلتي عشان ثقتك ف نفسك كبيرة وعرفتي توصليها لي ، إحنا لسه مشوفناش منك اي qualifications عملية !! ”
لحظتها وقفت كتير عند الجملة دي وقولت هيجي اليوم اللي أكون فيه مكان الشخص اللي كان بيعملي إنترفيو وأثبت لنفسي و للمكان إني أد الثقة والتحدي
بدأت شغلي في شركتي كمديكال ريب وبدأت رحلة جديدة ” الصراع بين التوفيق في الشغل والكارير الأكاديمي وازاي أكون عاملة موازنة ”
بدأت البري ماستر في 2018 بعد تفكير كتير وإحباط من كل اللي حواليا لدرجة وقتها مش ناسية جملة ” انتِ مش هتعرفي توفقي بين شغلك في شركة كبيرة زي الأندلس و بين الماستر ، مؤكد هتفشلي ف حاجة منهم !! ”
ولكن دايماً أنا مؤمنة بالجملة دي
” ومهما خانتك إختياراتك ، فلن يخونك لطف الله ، لطفه كان محاوطني ف كل خطوة ”
ربنا جعل ف طريقي رسايل من كذا شخص تتقالي ف الوقت المناسب عشان أكمل وعلي رأسهم صديقة عمري اللي لما رحت لها في يوم معيطة ومحبطة وبقولها مخنوقة اعمل ايه !! قالتلي تعبير خطف قلبي وخداه سكرين شوت من 2018 حتي الان ” المستحيل اللي محدش يقدر يعمله في الدنيا ، هدير تقدر تعمله وانا واثقه فيكي لأقصي درجة ، كملي وانا جنبك وهشجعك متقفيش دوسي ”
مع كل خطوة كنت اتعكبل فيها واحس باحباط كنت فوراً أجري أجيب السكرين دي وابتسم واكمل من تاني
2018 كانت بالنسبة لي سنة التحدي ” محتاجة اركز لمذاكرة البري ماستر ونفس الوقت أنا في شركة كبيرة بطبيعة شغل محتاجة مجهود وتركيز ”
إستعنت بالله ونظمت وقتي وحطيت هدف قصاد عيني
طلعت الاولي علي دفعة البري ماستر كاملة تقدير امتياز مرتبة شرف
أخدت ستيب السينيورتي في شغلي (1-2019 )
عملت لونش في شركتي لدوا مخ واعصاب مهم جدا والاول والوحيد في السوق المصري
(11-2019)
وكانت اول مسؤليه كاملة تحطها لي الشركة والحمد لله كان اقوي لونش إتحاكي بيه شركات الماركت كلها
يوم (2021-1-4) إتعمل ميتنج مفاجيء في الشركة ووقتها البيزنس يونت أعلنت ترقيتي لتايتل Associate product manager لاين مخ واعصاب
وقتها كنت اصغر مديرة في الشركة 25 سنة !!
لظروف شخصية خارجة عن إرادتي إعتذرت عن الترقية بعدها بشهر ( بس مع كل خبطة باخدها في الرحلة انا مش ناسيه حلمي ولا هدفي بق واقوم وانا مركزة علي اتجاهي )
وسط كل الدوامة دي كنت منظمة وقتي ومش ناسيه الماستر وضغط العملي
أخدت كل الكورسات اللي تؤهلني للتسجيل لدرجة الماجيستير
سجلت لدرجة الماجيستير ، نشرت أبحاث دولية ، إتكرمت في المؤتمر السنوي الأول بجامعة بنها كأفضل بحث علمي و رسالة علمية مركز أول لعام 2022 وهيتقدم جزء منه كبراءة إختراع لاكاديميه علمية في خطوة الدكتوراة باءذن الله
طورت نفسي في شغلي وإشتغلت علي نفسي كتير وخدت كورسات تخليني مؤهله للخطوات الجاية مش بس ع مستوي الشغل او كارير الاكاديمي لاء كمان ع المستوي الشخصي
قدمت أونلاين لأكاديمية زاد للعلوم الدينية ودرست فيها سنتين وخلصتها بتقدير امتياز
حاليا بدرس اللغة الاسبانية ” بحكم ان بيجيلي منح كتير بره ”
ومقدمة علي كورس IELTS في الجامعة الامريكية بالقاهرة … إلخ
مش ناسية مرة حد لطيف في شغلي قالي ” انتِ بتتطوري ميتنج بعد ميتنج ، انا كل مرة بلاحظ انك بتتحسني عن اللي قبلها بسرعة ”
كل ما كنت اقع ويقابلني صدمات كنت بعمل حاجة واحدة بس ” بساعد غيري ”
عملت فكرة جروب لتجميع زمايلي في نفس التخصص اللي لسه متخرجين وتايهين وبدأت معاهم واحدة واحدة
والحمد لله عدي سنتين ع الجروب ده وماشاء الله العدد بيزيد وكله بيفيد غيره حسب خبرته ومبدأي الثابت قدام عيني وطول طريق الرحلة
” إختصر علي الناس الطريق اللي إنت خدته في عشر خطوات وخليهم ياخدوه في خطوة واحدة !! ”
كل دي بدايات لنجاحات تانية وخطوات بتكمل بفضل ربنا ، انا لسه معملتش حاجة ، لسه قدامي مشوار طويل وحلم كبير عايزة احققه ف شغلي واكون مسؤلة عن ال Medical support في شركتي واكمله بالدكتوراة والابحاث جوه وبره مصر
هحس بإنتصار عظيم وقت ما أكون فعلا قدمت حاجة تفيد البشرية بأكملها ، وقتها بس هكون عايزة اسمع التصقيف واشوف الفرحة في عيون غيري ، لكن لحد دلوقت انا لسه بحارب وبعافر و هكمل وهقع وهقوم
لسه الرحلة بتبدأ منتهتش !
مناقشة الماجيستير ع الابواب ومضغوطة جدا ف التجهيزات
ولغبطة بين شعور الفرحة والعياط والتفكير في يوم المناقشة
واسئلة كتير بتدور في تفكيري
معقول خلاص تعب السنين عدي ومجهود 3 سنين هيتترجم لفرحة ونجاح كمان أيام بسيطة !!
معقول قدرت أكون اد ثقتي في نفسي واد التحدي واثبت لكل اللي قالي هتفشلي ف الشغل والماستر إني بفضل ربنا حققت نجاحات ف الاتنين !!
عمرها ما كانت بشطارتي أو مجهودي ، كان فضل و كرم ربنا عليا محاوطني في كل تفصيلة وكل خطوة بخطيها ❤
دعواتكم أناقش ع خير
دعواتكم الرحلة تكمل بسلام
دعواتكم أكون دايماً راضية طول الرحلة ومملش ابدا او افقد شغفي .
