كتب / عزة صبري
الكلمة دى باسمعها كتير وفى مناسبات مختلفة….وبتكون غالبا مقرونة بنهاية غير سعيدة فى علاقة ما…او مكان ما…
الزوجة اللى عاشت سنوات وصبرت وضحت واتحملت كتير…بتيجى فى لحظة معينة وتقف وتقول خلاص…. موش عاوزة اكمل…وكل اللى حواليها يستغرب..ليه..ماانتى طول عمرك صابرة ايه اللى جد…
فيكون ردها..جبت أخرى…
الموظف او العامل اللى شايل على كتافه وبيخلص المطلوب منه..ومن زمايله كمان..ويخلص مصلحة ده..ويقضى مشوار ده..ويسد مكان ده…بيجى فى يوم ويقول خلاص موش قادر….واللى حواليه برضه يسألوا نفس السؤال…ليه..ايه اللى غيرك…فتكون الاجابة…جبت أخرى…
وقيسوا على كدة فى علاقات كتيرة زى علاقة صداقة او حب او جيرة….او حتى علاقة اخوات…
الانسان اللى طول عمر العلاقة هو اللى قايم بدور البطولة فى التضحية والتحمل والتغاضى…بيجى عند وقت معين…وحمل معين..وبينخ زى الجمل..مابيقدرش يقوم بالحمل اللى شايله مع ان ممكن يكون الحمل ده هو هو اللى متعود يشيله من زمان..ويمكن اخف…وزى ماالمقولة الشهيرة بتقول..القشة التى قسمت ظهر البعير..او القطرة التى فتتت الصخرة…بتكون دى النتيجة الحتيمة لتلك التحملات المتتابعة..واللى ماكانش بياخد فيها نفسه ويريح…ماوقفش لحظة فى رحلة حياته وقال ياجماعة انا موش قادر اشيل…لكن بآوح…انا موش قادرة اتحمل لكن خايفة العلاقة تفشل..انا موش قادر اعمل شغلكم لكن خايف افقدكم…
عادة الشخصيات اللى من نوعية دى واللى بتقوم بادوار البطولة المطلقة فى حياة المحيطين بيها بتنسحب فى لحظة بدون تفكير او رجعة…لانها فعلا جابت آخرها…طيب مانتبع الآية الكريمة اللى بتقول(( لا يكلف الله نفسا إلا وسعها))..
فى سبق الخيل..عادة الحصان الرابح او الجوكى…مابيكونش ظاهر فى اول السباق..بالعكس الفارس اللى بيقوده مابيجهدهوش فى اول المضمار لكن فى وقت معين ومسافة معينة..بيشد علشان يقدر يقطع المسافة دى ويفوز بالسباق..
ياريت كلنا نتعلم انه موش لازم ندوس بنزين على الآخر…موش لازم تجيب اخرك…موش لازم تقوم بدور البطولة المطلقة فى حدوتة معاك فيها ناس تانية….
علشان ماتقعش قبل نهاية الرحلة وماتقدرش تكمل لانك للاسف جبت اخرك..
#azza sabriy #
