كتب/عزة صبري
ازاى البنت بتختار شريك حياتها….او بمعنى تانى…ايه هى مواصفات فتى أحلامها…
كل بنت اكيد ليها صورة فى خيالها رسماها للشخص اللى بتتمنى ترتبط بيه وتكمل معاه مشوار الحياة…وده بيكون نابع من أحلامها ونظرتها لفكرة الزواج …لان كل واحدة بتنظر للزواج نظرة مختلفة عن التانية…فيه اللى شايفة ان الزواج يعنى حرية وانطلاق ورحلات وخروجات كانت مفتقداهم فى بيت أهلها نتيجة طباع وتحكمات معينة…فبتلاقيها بتدور على الشاب اللى مقضيها سفر وتنطيط…منغير ماتاخد بالها من حاجات تانية مهمة لازم تكون متوفرة فى شريك الحياة….
فيه بنت بتكون مفتقده جو العيلة ولمة الأسرة فبتتشد للشاب اللى مرتبط بوالدته واخواته ويمكن كمان توافق تعيش فى بيت العيلة…وبعد فترة…المشاكل تظهر كنتيجة طبيعية لاختلاف الطبائع والعادات والممارسات اليومية…
وفيه واحدة تانية بتدور على الامان المادى وبتختار اللى هيأمن لها حياة ميسرة …حتى لو كان أكبر منها بسنوات وبينهم فجوة فى التفكير …
العبرة فى اختيارك لشريك حياتك موش هو انتى مفتقدة ايه …العبرة فى الاختيار هو انتى هينفع تكملى مع الشخص ده مشوار حياتك…واللى انتى مفتقداه..حاولى تحققيه مع الانسان المناسب لكن حققيه لاولادك…وبالتبعية هتلاقى نفسك اكتمل بداخلك شعور الفقد للشئ ده..لانك اختارى صح….هى موش قواعد لازم يمشى عليها الجميع على اد ماهى اساسيات يجب توافر الغالب الاعظم منها بما يتناسب وكل بنت وظروفها على حدى…ولازم كل بنت تفكر فى كل النواحي الاخرى ولا تكتفى بناحية واحدة او جزء واحد وجدته فى الانسان اللى هترتبط بيه….حتى لو كان الجزء ده هى مفتقداه فى حياتها…لان الزواج موش حياتها هى بس…ده هيكون كمان حياة اولادها فى المستقبل فلازم تختار على الأساس ده…
#azza sabriy #
