بقلم ريهام طارق
جربت إنك تسلم ان مش كل الناس هتحبك عادي يعني بتحصل
دي مشكلتهم هم .. دا لا يضرك و لا ينقص من قيمتك شيء
جربت أن ناس ممكن تكون قريبة منك أوي في فترة و فجأة تبعد.
و ناس بعيدة ممكن فجأة تبقي أقرب ما ليك.
تلاقي نفسك بتقول عادي إيه المشكلة مفيش حاجة بتفضل علي حالها
جربت إنك تكلم حد واحشك لمجرد أنه واحشك
و انت متأكد انك ولا بتيجي علي باله اصلا
بس كلمته علشان تبقي مبسوط انك حققت رغبةجواك وخطفت ذكري حلوة كانت وحشاك
من غير حتي ما تستني وتشوف أنه هيسأل بعدها و لا هتوحشه انت كمان ولا لا
جربت إنك تبقى قاعد في أمان الله و تلاقي حد مش بتحبه جالك زي القضاء المستعجل..
فتطفي النور في عقلك فجأة و الدنيا يحصل لها pause لا أنت سامعه و لا شايفه و لا حاسس بوجوده .. خيال متحرك قصادك .. تفاعلك معاه تفاعل سطحي بحت ..محافظ علي طاقتك قدامه كانك في فقاعة هواء معزول عن طاقته.. يمشي بعدها و ياخد في ايده غلاسته بدون أي خسائر نفسية و كأن شيئا لم يكن
جربت تقتنع أننا مش هنقدر نصلح الكون كله
و انك ملكش سلطة غير علي نفسك تقيمها و تقومها ..
فبالتالي لما تدخل في نقاش غير متكافيء تلاقي نفسك لا بتبرر و لا بتحاول تقنع الطرف الآخر بفكرة .. بالسلامة الفكرة علي صاحبها
لاما تستمتع بالحوار لاما تنسحب منه بمنتهى الشياكة و مرسوم علي وشك ابتسامة عريضة !!
جربت إنك تسيب اللي بيكدب يكمل كدبه و انت قاعد مسالم و متقبل الشخص بس رافض سلوكه .. عارف ممكن يكون بيحاول يداري نقطة ضعف جواه بانه يلبس ماسك الكذب ..و أنه شخص هاش من جواه فتسيبه يكمل و من غير إحراج
جربت إنك تبتسم بسخرية و انت بتتفرج علي الناس بتتلون و تتصارع علشان حاجات ملهاش قيمة و تبقي نفسك تصرخ فيهم ” ينيلكم منك ليها هنموت كلنا ” بس بتلاقي حاجة بتقولك ملناش دعوة يا موهيي انصح و أجري
طيب جربت إنك تحب حياتك كلها كدة علي بعضها بقرفها و عكها .. تعيش اليوم الملخبط و انت مستني تنام و تصحي علي يقين أن اليوم اللي بعده هيكون أحسن و ارحم من اللخبطة دي ..
و تقابل أزمة ورا التانية بتحدي انك هتعدي و هتخرج من الأزمة ببسمه تغسل كل الهموم اللي تعبتك !!
اللي لسة ما جربش يحاول يجرب
مش استسلام أبدا علي أد ما هو بداية للإنسجام مع النفس !!
مش استهتار باللي حواليك برضو علي أد ما هو ترميم و إنقاذ لما يمكن إنقاذه للي باقي في عمر الواحد !!
مش بلادة مشاعر خالص ..سلام داخلي مع النفس
مع كل الحب ريهام طارق
