كتب: أ/رشا طه أحمد
اخصائي تعديل السلوك
ازاي اخلي ابني صاحبي وازاي اخلي الطفل يحبني
مفيش طفل قلبه بينصرف عن اهله من يوم وليلة اكيد في حاجات هي اللي كسرت في الطفل قربه منا😴
الكبار بيبقو فاهمين ان مش معني ان الطفل مش صاحبي حاليا ان الطفل وحش.. لكن الطفل بمحدودة فكره بيبقي شايف ان اهلي طالما معرفوش يحببوني فيهم انهم وحشين وكمان مش بيحبوني
يبقي احنا هنا لازم نعرف اننا محتاجين وقت.. وقت ندي في رصيد الطفل.. نعوضه عن كل مرة ضربناه وصرخنا في وشه وكل مرة اتعامل بأساءه وكانه عدو لينا.
رصيدك الحلو عند الطفل هيخليه يحبك ولو الطفل حبك هيسمع كلامك ولو سمع كلامك انت هتبقي مبسوط
عشان تبسط نفسك انفق مما تحب.. خليه يحبك ويصاحبك..
1/اخاطب الطفل حسب شخصيته👶.
-في طفل يحب الاحضان واللمس والطبطبة والضرب مبينساش ابدا المطلوب منك هنا انك تحضنه كتير وبوسه وتتواصل معاه بلمسه كتير.
-في طفل بيحب الكلام ويقعد يتكلم متقولش عليه رغاي ولكن اقعد وظف كلامه ده بأنك تحكي له حدوتة وتقوله ايه اللي استفدته او لو كبير شوية خد رايه طول الوقت ودايما النوع ده بيحب التشجيع والدعم وبيكره جدا اللوم والنقد.
– في طفل بيحب انك تقابله كويس متكشرش في وشه تفتخر بيه قدام الناس وغالبا النوع ده هتلاقيه بيحب يتفرج علي صور او بيحب التابلت النوع ده تكسبه عن طريق انك تديله من انتباهك وانت بتتكلم معاه.. ماتغلطش فيه قدام حد.. متبصلوش بقرف.. ابتسم في وشه وخليه يشوف الحب علي وشك لانه م بيفهم الحب غير لو شافه.
2/ وقت تعب الطفل حسي بيه واعترفي بمشاعره يعني هو بنسباله قلمه اللي اتكسر شي محزن زي ما انتي بنسبالك شي محزن انك تفقدي موبيلك.. بنظرتك هتقولي ده قلم بنظرته وبعالمه الصغير هو شايف القلم ده حاجة كبيرة.. فمحتاج منك دايما تحسي بمشاكله البسيطة من وجه نظره وتتعاطفي معاها وتوصليله ده.. قربي جدا وقت مرضه.
3/ حبيه حب غير مشروط نبعد عن جمل انت شبه فلان اللي مش بحبه.. يا ابو مناخير كبيرة.. هحبك لو جبت درجة حلوة
وصليله حبك له حتي وهو مش جايب درجة حلوة قوليله انا بحبك في كل حالاتك حتي وانت عامل مشاكل لكن هفرح اوي لو اتحسنت.. هفرح اوي لو بقيت كويس.. بلاش تحسسيه ان قبولك له كطفل معتمد علي شئ معين.. الاطفال بتقابل تنمر يكفي العالم لو انتي كمان هتتنمري علي طفلك مين هيحسسه بالقبول؟؟!.
4/جيبيله هدايا ولو بسيطة البسيط بالنسبالك كبير بالنسباله وعرفيه انك فكرتي فيه مش مجرد بتجيبي حاجة من غير ما تعبري عن مشاعرك .
5/خدي رأيه حتي لو لسه صغير بكرة هيبقي هو صاحبك ومنطقةالامان بالنسبالك لانك من صغره معوداه انه له اهمية وبتقعدي تسمعيله.. حتي لو في الاول لما بتاخدي رأيه مبيقولش حاجة.. مع الوقت هياخد علي انه يعبر ويتكلم وانه له كيان قادر يشارك ويفكر.
6/اخرجي من فترة للتانية معاه هو لوحده وقعدي اتكلمي معاه وفي مشاكله وفي مخاوفه.. اللي هتزرعيه النهاردة هتحصديه بكرة لما تكبري وتبقي محتاجة حد يديلك من وقته.
7/خليه يتكلم في غلطاته قدامك وناقشيه فيها اي رعب هيحسه منك وهو بيعترف بالخطأ الغير مقصود هيبني حاجز ان بعد كده يختار يحكي ايه وما يحكيش ايه..
8/لو حد اشتكي منه ماتعقبهوش علي طول اسأليه الاول ايه حصل انا سمعت من الطرف التاني ومحتاجة انت كمان تقولي اللي حصل.. خصوصا قدام الناس ماينفعش يبقي حد بيشتكي منه وتروحي تعاقبيه قدامه لأ اندهي الطفل وقوليله احكي اللي حصل زي ما سمعت من غيرك اسمع منك.
9/تجاوز فترة المقاومة الفترة اللي فيها انت بدأت تتعامل حلو وهو لسه اسلوبه وحش لان هنا عقله بيقوله علي فكرة ماما عايشة حلاوة روح ماما مش بتخبني ولا حاجة يومين وهترجع تاني تعاملني وحش فانت مطلوب منك تصبر لحد ما يفهم ان لأ خلاص ماما بقت تعرف تحبني وتحسن ليا.
10/ تابعي بيدج محو الأمية الزوجية_مايسة كمال .
11/البرمجة طول الوقت شجعه وبرمجه انه هيبقي كويس انك واثق فيه انه في صفات حلوة.
12/ماتسمحش حد يتريق علي شكله ورد علي كلام اي تريقة بحسم احيانا وباللين احيانا مع ناس اخري‘ ولكن المهم توصل فكرة للي بيتريق ان ابنك حلو وملامحه حلوة جداااا وعلمه يرد يقول ايه علي كل تنمر يتقاله عن شكله.
13/في فروق فردية في طفل مثلا مهما عملتله في المذاكرة. مستواه مش هيبقي عالي اوي وطفل من اقل حاجة بيظهر مجهودك معاه تقبله بمشاكله واعرف بس انك عليك السعي مش عليك ادراك النجاح.
14/ ااشاركه في الحاجات اللي بيحبها حسب سنه وحسب اهتمامته.
