عندى قناعة تامة ان مافيش علاقات بتنتهى فجأة…اى علاقة اى كان المسمى بتاعها…زواج..صداقة…أخوة.. حتى…بتخلص بالتدريج…بالتراكمات……برصيد ماحدش عرف منهم يزوده..او حتى يحافظ عليه منغير مايقل…
علشان كدة مابتفاجأش لما باسمع خبر انفصال Couple بعد فترة من ارتباط متوتر…ومتوتر هنا مااقصدش بيه ارتباط فيه مشاكل…لان كلنا بيعدى علينا مشاكل فى حياتنا….لكن فرق بين مشاكل نتيجة عشرة واختلاف وجهات نظر…وفرق بين حالة ترقب ورصد كل همسة او كلمة او نفس….وتصيد الهفوات و تسجيل زلات اللسان ومراقبة فاحصة بميكريسكوب التحليل النفسى لاى ردة فعل او سلوك عفوى من الطرف الآخر…
وعمل صندوق اسود يحتفظ بيه بكل ماسبق…وفجأة…يحدث الانفجار…والغريبة ان معظم اللى بينفصلوا من اى علاقة حتى لو صحوبية….لما واحد بيبدأ وياخد الخطوة الاجرأ ويعلن لحظة النهاية …بتلاقى ان الطرف التانى موش متفاجئ..ويمكن تسمع منه كلمة ((كويس انك قلتها .وفرت عليا الخطوة دى انا كنت عاوزاها من زمان))…
وده ببساطة لان الرصيد خلص…والعلاقة انتهت اكلينيكا…لكن بعض الحياء المتبقى بينهم بيمنعهم انهم يعلنوا ده…..
حافظوا على اللى بيحاول يزود رصيد العلاقة بينكم…او على الاقل بيحاول انها ماتقلش….ده اللى ممكن تكملوا معاه للآخر وانتوا متطمنيين..
وماتتفاجأوش لو حد لف وشه الناحية التانية وسابكم ومشى منغير عتاب…كان فيه مقدمات كتير للحظة الفراق دى..انتوا بس اللى مااخدتوش بالكم منها….او اخدتم….وحيائكم منعكم تاخدوا الخطوة الأولى فى الانسحاب….
#azza sabriy #
الانفصال….
